Assam : CM in Dibrugarh tlawh

Assam chief minister Himanta Biswa Sarma chu March 20 aṭanga 23 thleng cham turin nimin khan Dibrugarh a thleng. CM hi tlai dar 4:00-ah cabinet meeting nei tura ruahman a ni a, hemi hnu hian party MLA-te nen review meeting an nei ang.

Dibrugarh tlawh program hi CM Sarma-a'n 'Housing for all' hmalakna lian tak a kalpui hnua ruahman a ni a, Nilaini khan Chief Minister chuan Pradhan Mantri Awas Yojana-Gramin (PMAY-G) hnuaiah sanction letter nuai 3.9 vel sem ṭanin, Kamrup district-a Rampur, Palashbhari-a inkhawm buatsaihah hamṭhatna dawngtu 10 hnenah a hlan a ni.

Official thuchhuah tarlan danin, hamṭhatna dawngtu te hian installment hmasa ber Rs 37,500 chu direct-in an bank account-ah an dawng dawn a ni. He inkhawm neih chhung hian Sarma chuan mi zawng zawng tana chenna in sak tura sorkar inpekna chu a sawi uar hle.

PMAY-G sanction letter sem a nih tak avangin State sorkar chuan 'Housing for all' chu a taka kalpui a nih theih nan thutlukna siamin hma a la a ni, tiin Sarma chuan a sawi. PMAY in nuai 26 sak tum tihfel an tum thu leh, Assam-a mirethei te'n anmahni pucca house an neih theih nan in nuai 15 siam belh tura ruahmanna siam an tum thu a sawi bawk.

Tun kar tir lam khan CM Sarma hian Silchar-a SM Dev Civil Hospital-ah khum 50 awmna critical care block sakna tur lungphum a phum tawh a ni. RS vbc 24 senga sak tur hian square meter 6,335-a zau floor panga a ni dawn a, ICU, operation theater, isolation ward, leh pediatric care unit te a awm dawn a ni. Sarma hian a tlawh chhung hian Silchar-ah Circuit House thar sakna tur a hawng bawk.