Assam : Congress MP-in CM hnenah union cabinet thutlukna sawi chiang turin ngen

Assam Congress MP Gaurav Gogoi chuan Ningani khan Assam chief minister Himanta Biswa Sarma chu union cabinet-in Namrup urea plant din tura thutlukna a siamah Assam mipuite a hruai sual em tih chiang zawka sawi turin a ngen. Kum 2015 leh 2017-a hetiang thu hi sorkar laipui chuan a lo puang tawh a ni.

Gogoi chuan kum 2015 khan prime minister Narendra Modi kaihhruaina hnuaiah Cabinet Committee on Economic Affairs chuan Assam-ah brownfield Ammonia-Urea complex thar, Namrup Unit IV din a remti tawh tih a sawi. Hei bakah hian kum 2017 khan sorkar laipui chuan Assam Namrup Unit 4 atan Rs vbc 7200 ruahman a nih thu a puang tawh bawk niin Gogoi chuan a sawi.

Congress MP chuan tun hnaia cabinet meeting-ah PM Modi chuan kum 2015-a Brahmaputra Valley Fertilizer Corporation hmun awmsa chhunga Brownfield Ammonia-Urea Complex thar din tura rawtna pawm tura a thutlukna chu pawm nawn lehin, hemi atana sum ruahman pawh Rs vbc 10,601-ah tihsan a nih thu sawiin, Assam mipuite chu BJP-in a hruai sual em tih CM Sarma-a’n a tichiang tur a ni, a ti.

Namrup urea plant-ah hian kum khatah urea siamchhuah theih tura ruahmana hi metric ton Nuai 12.7 (LMT) a ni a, Joint Venture (JV) model hmanga siam tur niin, debt-equity ratio 70:30 a ni dawn a, thla 48 hnuah commission theih beisei a ni.