Supreme Court judge-ten Manipur an tlawh

Supreme Court justice BR Gavai kaihhruaiin Supreme Court judge-te chuan ni hnih cham turin Manipur an tlawh a, relief camp-te an tlawh kual.

Judge rualte hian Inrinni khan Manipur hi a thleng a, tualchhung buaina thleng vanga in leh lo chhuahsan, relief camp hrang hranga awmte an hmu nghal a ni. Manipur tlawhtu zingah hian justice - Surya Kant, Vikram Nath, MM Sundresh, KV Viswanathan leh N Kotishwar te an tel.

Palaite hian relief camp-a awmte ṭanpuina leh chhawmdawlna pek dante enfiahin, hma lak chhunzawm dan turte an ngaihtuah dawn a ni.

Pathianni khan Chura­chandpur-ah tualchhung mite hmuin, hun harsa tak an tawh mekte pawh a reh thuai tur thu an hrilh. Manipur-ah inpumkhatna ṭha a awm theihna atana ram danpui kenkawh a ṭul thute an sawi a, Manipur-ah boruak ngelnghet leh muanawm a awm leh thuai dawn a ni, an ti.

Justice Gavai chuan an cham chhung hian virtual hmangin a thlawna legal aid leh medical camp siamte a hawng nghal bawk. Tualchhung buaina thleng avanga harsatna tawkten rorelna dik leh an dikna chanvote an hmuh theihna tura dan lama puih an ngaihnaa a thlawna puitu turte an ruahman a ni. "An dinhmun siamṭhaa indin thar lehna turah kan theihtawpin kan pui zel dawn a ni," a ti. Judge-te hian Imphal leh Bishnupur-a relief camp-te an tlawh a ni.