Meghalaya: NEHU zirlai pawlte'n thupek hnawl turin staff-te ngen

Mehgalaya-a North-Eastern Hill University (NEHU) zirlai pawl chuan non-teaching staff-te chu hmun hla tak aṭanga institution kaihhruai tumte thupek chu hnawl leh ngaihthah vek turin an ngen.

North-Eastern Hill University Students Union (NEHUSU) leh Khasi Students Union (KSU) chuan university non-teaching staff association hnenah lehkha thawnin, vice chancellor Prof PS Shukla leh Registrar Col. Omkar Singh-te hnen aṭanga kaihhruaina, thupek, meeting, thutlukna emaw inzirtirna eng pawh an dawng a nih pawhin ngaihthah turin an ngen a ni.

Zirlai pawlte sawi danin, administrator pahnihte hi hun rei tak chhung campus-ah awm lo mah se, university thuneihna pawn lam aṭangin thupek an chhuah chhunzawm zel a ni. Hei hian NEHU Act, 1973 Section 6(1) a bawhchhia a ni, an ti.

Prof. PS Shukla hi ni 127 chhung chawlh a la chhunzawm tawh a, November 15, 2024 aṭang khan hna a thawk tawh lo tih lehkhaah chuan an tarlang. Zirlaite chuan Shukla-a'n Delhi aṭanga online hmanga hnathawh a tumna chu an hnawl bawk.

Zirlai pawlte chuan university danin hmun hla tak aṭanga university kaihhruai tum chu phal a nih loh thu sawiin, hetiang anga tih chuan institution enkawlna dik tak a tichhe thei tih an sawi. Col. Singh pawh chawlh a lak aṭang khan university-ah a la in report leh lo tiin an sawi.