Tripura : Zirlai pawlte'n nawrh huaihawt an ṭhulh

Tripura-a NESO nena inzawm zirlai pawl, Twipra Students Federation chuan Pathianni khan nimin, March 24-a Agartala-a nawrh huaihawt tura ruahmanna an siam chu chief minister Manik Saha, a chenna ina an hmuh hnuah an ṭhulh.

TSF vice president John Debbarma chuan an inbiaknaah CM Manik Saha chuan hun pe rih tura a ngen thu sawiin, Roman Script a dodal loh thu a hrilh tih a sawi. CM-in lo dawhthei rih tura a ngen avang hian Thawhṭannia nawrh huaihawt chu tih tawp a nih thu Debbarma chuan a sawi a, Chief Minister-in he thubuai chungchanga a rilru put hmang ṭha tak chu a ngaihpawimawh thu a sawi bawk.

CM Saha pawhin Twipra Students Federation (TSF) palaite nen an inkawm thu leh, an harsatna tawh chinfel dan tur zawng tura thawh ho tiamin ‘Ek Tripura, Viksit Tripura’ an duhna leh state hmasawnna atana an inpeknaah lawmthu a sawi. Tripura tana hmalam hun êng zawk siam tura thawh hona ṭha tak neih a beisei thu Chief Minister chuan a sawi a ni.