Assam: Lilavati Foundation leh Assam sorkarin MoU ziak

Lilavati Foundation chuan Thawhṭanni khan Assam sorkar nen thawhdunna tur inremna thuthlung an ziah thu sawiin, Guwahati-ah Rs vbc 300-350 senga super-speciality hospital din a ni dawn a, he facility hi hmarchhak bial leh ṭhenawm ram Bangladesh leh Bhutan ten an ṭangkaipui tur thu a sawi.

Foundation hian India ram pum huapa an huang zauh nan multi-speciality hospital din chungchangah state eng emaw zat nen inbiakna an neih thu an sawi bawk.

MoU an ziahah Guwahati-ah hian khum 250 aṭanga 300 awmna tura super-speciality hospital din turah oncology leh cardiology an ngaih pawimawh tur thu an sawi. Hmarchhak bial tana healthcare destination hmasa ber ni tura ruahman a ni a, ṭhenawm ram Bhutan leh Bangladesh te pawh a huam tel dawn a ni, an ti.

Assam sorkar chuan he project atan hian ram acre thum a pe a, kum hnih aṭanga kum thum chhunga zawh hman beisei a nih thu Prashant Mehta, founder leh chairperson chuan a sawi.

He project hi hriselna lama hmasawnna ropui tak tur niin, state sorkarin nasa taka a thlawp bawk avangin medical tourism leh specialized medical service changtlung tak a awm dawn tih Mehta chuan a sawi bawk. Mumbai-a Bandra Lilavati Hospital enkawltu foundation chuan, India ram pumah multi-speciality hospital leh medical college dinna tur pawh an ngaihtuah mek thu sawiin, heng zingah hian Goa, Delhi, Jaipur, Hyderabad, leh Bengaluru te pawh a tel.