Assam: Journalist man nawn leh; CM in journalist-ah pawm lo

Assam journalist Dilwar Hussain Mozumdar chu Guwahati court-in bail a phalsak aṭanga ni khat hnu, Ningani tlai khan a laka thubuai hran siamah man leh a ni. Assam Co-operative Apex Bank (ACAB) managing director Dombaru Saikia chuan Thawhlehni khan complaint a theh lut a, journalist hi dan loin bank-ah hian lutin, document laksak a tum niin a puh.

Case pahnihnaa Mozumdar man a nih hma hian chief minister Himanta Biswa Sarma chuan thuthar lakhawmtute a kawmnaah, case pahnih aia tam ziah luh a nih tawh thu leh, man a nih tur thu sawiin, bail a dil theih thu a sawi bawk.

Assam digital media portal, The CrossCurrent reporter Mozumdar hi Thawhlehni khan Pan Bazar police station-ah man a ni. Hei hi bank security guard-in complaint a thehluh vang niin, SC/ST Act bawhchhiaa puhna thubuai siamsak a ni.

Assam journalist pawlte chuan Nilaini khan Mozumdar-a man a nih chungchangah lungawi lohna an lo lantir tawh a, press zalenna beihna niin an sawi. Mahse Ningani khan CM Sarma chuan Mozumdar hi journalist tia koh theih a nih leh nih loh zawhna a siam a, Assam sorkar chuan online news portal-a thawkte chu journalist-ah official-in a pawm lo niin a sawi ve thung.YouTube channel leh portal te chu sorkar pawmpui an nih leh nih loh sawi ho mek a nih thu CM Sarma chuan sawiin, thutlukna siam a la nih loh bakah register a la ni lo a, advertisement leh ID card pek an ni lo bawk tih a sawi. Hei vang hian Assam sorkar chuan journalist ah a pawm loa, sumdawng anga ngaih an nih thu a sawi.