Meghalaya CM-in minister-te chanpual siksawi

Meghalaya chief minister Conrad Sangma chuan minister ṭhenkhat chan­pual siksawiin, a u James Conrad-a chan, home (police) portfolio chu ṭangrual sorkar an siampui party dangte leh cabinet minister dangte nawrna avangin midang kutah a pe. 

James Conrad hi dan loa an state chhunga lungalhthei phurchhuah venna kawng­ah a hlawhchham nia puhin sawisel a tawk fo a, minister dangte leh ṭangrual sorkara tel party dangte pawh a lakah an lungawi lo a ni. Hei vang hian home ministry hi midang kuta dah turin CM hi an nawr a ni. 

CM chuan James Conrad-a chan zinga a pawimawh pahnih, home leh district council affairs portfolio chu midang kutah pein, home chu Lahkmen Rymbui chantir a ni. James Conrad hian Power, Taxation, Food, Civil Supplies and Consumer Affairs, Law and Information, leh Public Relations department-te a la chang chhunzawm ang. Rymbui hian home ministry bakah Education, Forest and Environment and Border Area Development te a la chang chhunzawm dawn bawk a ni. 

Conrad Sangma hian cabinet minister dangte chanpual pawh a siksawi nghal a, health minister Al Hek chu home (jail-passport) leh arts and culture charge lakbelh tir a ni a, urban affairs minister Hamletson Dohling pawh council affairs pek belh a ni bawk.