Sikkim : PM Modi-a'n Statehood Day hmanpui dawn

Prime minister Narendra Modi chu May 16-a Sikkim Statehood Day vawi 50-na lawmna hmanpuiin khuallian a ni dawn tih official report chuan a tarlang.

Sikkim chief minister Prem Singh Tamang-a'n nikum August 27-a New Delhi-a prime minister Narendra Modi a hmuh ṭum khan kumina statehood day lawmnaah khuallian tur hian a sawm a ni. Sikkim hi kum 1975-ah state puitlingah hlankai niin India rama state 22-na a ni a, kumin hian kum 50 a tling dawn a ni.

PM Modi hian Sikkim-a hmasawnna project eng emaw zat a hawng nghal dawn a, heng zingah hian khum 500 awmna Namchi District Hospital pawh a tel. Sikkim a tlawh chhung hian PM Modi chuan ram tana a thawhhlawkzia chawimawina atan Prime Minister hlui Atal Bihari Vajpayee lim a hawng bawk ang. Hei bakah Sangachoeling-a Passenger Ropeway a hawng dawn bawk a, hei hian Sangachoeling Monastery hmingthang tak a thlunzawm dawn a ni. He project hian tourism sector a ti chak dawn a, khualzin leh hmun thianghlim tlawhtute tan pawh monastery tlawh a awlsam phah dawn a ni. Namli-a Golden Jubilee Convention Centre sakna tur lungphum a phum dawn bakah, Singh Shore Bridge sakna tur leh Bhaley Dhunga Skywalk sakna tur lungphum a phum dawn bawk.____