Assam: Gaurav Gogoi-a'n PM hnenah lehkha thawn

Assam Congress hruaitu, Gaurav Gogoi chuan prime minister Narendra Modi hnenah lehkha thawnin, Assam Cooperative Apex Bank-a sum leh pai lama thil dik lo thleng nia sawi chungchang chhui chiang turin a ngen.

Lehkhathawnah hian senior journalist man a nih thu tarlangin, thil thleng mek hian bank kalphung, dan anga thupek hman dik loh, leh Assam press mite zalenna rahbeh sak chungchangah zawhna lian tak a siam a ni, a ti. Gogoi chuan March 25 khan journalist hian Assam State Co-operative Apex Bank kawta nawrh huaihawt chungchang a thlithlaina lamah police-te'n an man niin a sawi.

Congress hruaitu chuan Assam Chief Minister chu Bank-ah hian Director a ni a, BJP MLA Shri Biswajit Phukan chu Chairman a nih thu a sawi. Journalist an man chhanah hian finfiahna a awm loh avangin bail-a chhuah tir a ni a, a tuk zingah rukruk leh bank document pawimawh rukchhuah tum thubuai hmangin man leh a ni. He thil hian journalist in thudik haichhuah a tumna a tih ṭhuanawp tir niin a sawi bawk. Media report chuan bank hi June 2024 aṭang khan IT vendor te nen contract mumal nei loin an thawk a, hei hian security leh operational chungchangah ngaihtuahna lian tak a siam a ni, tiin a tarlang.

Banking infrastructure senso hi kum 2018-ah Rs vbc 28 niin, kum 2025-ah Rs vbc 150 vel a ni a, Rs vbc 14 chu KPMG-ah pek chhuah a nih thu Gogoi chuan a sawi. January 30 khan Central Vigilance Commission-ah complaint thehluh a ni a, mahse state sorkar chuan thuchhuah a la nei lo thung. March 3-ah Assam Cooperation Department chuan Registrar of Cooperative Societies chu an puhna hi chhui chiang tur leh, ni 15 chhunga report thehlut turin a hriattir. Mahse nawrh huaihawttute chuan hei hi thil tih dan pangngai mai niin an sawi a, sorkar chuan he thila inhnamhnawihte chu a hum niin an sawi, tiin Gogoi chuan lehkhathawnah hian a sawi.