Assam: CM-in state ropeway pahnihna tur lungphum a phum

Assam chief minister Himanta Biswa Sarma chuan Thawhṭanni, March 31 khan state ropeway pahnihna, Biswanath Ghat leh Umatumuni River Island thlunzawmna tur lungphum a phum a,district chhunga automatic driving testing station a hawng bawk.

Rs vbc 60 senna tur ropeway project hi thla 18 chhunga zawh hman beisei a ni. Kum khat leh a chanve hnuah Biswanath mipuite chuan Guwahati hnuah state ropeway pahnihna an nei dawn a ni, tiin Sarma chuan a puang.

Ropeway hian minute thum chhungin passenger-te chu one way-ah a phur thei dawn a, he biala inkalpawhna leh tourism nasa takin a ti chak dawn a ni. Hemi hma hian CM Sarma chuan Rs nuai 17 senga sak, automatic driving testing station a hawng a, hei hi helai hmuna bus leh truck tlan chak dan tehna atan a ni. Kawnga chetsualna thleng ṭhin tih ziaawmna tura a pawimawh tak tur a ni a, sumdawng lirthei zawng zawngin kum riat chhungin fitness check vawi hnih an nei tur a ni a, mimal lirtheite erawh chu kum 15 danah an enfiah tur a ni. He station hian heng lirthei enfiah a ti awlsam dawn a, certification detail pawh sorkar Vahan portal kaltlangin hmuh theih a ni ang, tiin CM chuan a sawi.

He hmunah hian nitin lirthei 300 thleng test theih a ni dawn a, tualchhung ṭhalaite tan hna thawh theihna tur a nih avangin skill training an pe dawn bawk a, hei bakah hian Hindi leh English course te pawh a tel dawn a ni. He hmalakna hian ṭhalaite chu state pawna hna an hmuh theih nan leh eizawnna ṭha zawk an neih theih nan a pui dawn a ni, tiin Sarma chuan a tarlang.

Chief Minister chuan Biswanath-ah medical college leh sports stadium puitling din a ni dawn tih a puang bawk a, skill lama hmasawnna pui turin BSc Nursing College, GNM school, leh paramedical institute din a rawt bawk. Gohpur-a Kanaklata University chu thla thum chhungin hna thawh ṭan a nih tur thu a sawi bawk.