Manipur: Biren Singh-a'n Congress sawisel

Manipur chief Minister hlui, BJP hruaitu N. Biren Singh chuan Congress party chu na taka beiin, Manipur-in Inner Line Permit (ILP) a phut hnawlsak leh, state duhthusam ngaihsak lohna lantirah a puh. Singh chuan September 4, 2012-a Parliament session neih ṭumin, Congress MP Dr. Thokchom Meinya-a’n ILP chungchang a sawi chhuahin Congress kaihhruai UPA sorkar-in chiang takin a hnawl tih a sawi.

Singh chuan hetih laia home affairs minister Mullappaly Ramachandran-a chhanna tarlangin, Congress kaihhruai sorkarin Manipur thil phut a hnawl thu hi a sawi. Congress chu lainatna nei lo leh Manipur chanchin leh identity danglam tak hriatpui loah a puh. State chhunga Congress hruaitute chuan he an hnawlna chungchang hi mipuite an hriattir ngai em tih zawhna a siam bawk.

CM hlui chuan Congress chu tun hma aṭang tawhin Manipur mite second-class citizen anga a ngaih thu a sawi a, 1949 Merger Agreement siam a nih hnua Union Territory-a dah leh kum 1972-a statehood pek chauh an nih dan sawi nawn lehin, dan loa pem lutte chungchang ngaihthahah a puh bawk a ni.

Singh chuan prime minister Narendra Modi leh home minister Amit Shah-te kaihhruaina hnuaiah kum 2019 khan Manipur chu ILP pek an nih thu a sawi bawk.