Nagaland : Governor-in Central Library hawng

Nagaland governor La Ganesan chuan Thawhṭanni khan Dr. Keshav Baliram Hedgewar Central Library chu International University, Dimapur-ah a hawng.

He hun hi Rashtriya Swayamsevak Sangh (RSS) dintu Hedgewar-a pian champha vawi 136-na puala hman a ni. Governor chuan university leh a dintu, Dr. Priyaranjan Trivedi te an hmalakna avangin a fak hle a, library dinna kawnga an thawhrimna avangin faculty, zirlai leh administration-te chungah lawmthu a sawi bawk.

Library chu thiamna tih hmasawnna leh hnam ziarang chawikan kawnga pui thei a nih thu Governor chuan a sawi. Central Library chu Dr. Hedgewar hriatrengna atana din a nih thu leh hriatzauna, zirchianna leh zirna lama pui theitu a nih theih dan a tarlang. Library hmanraw ṭha leh changtlung chuan zirlaite thiamna lamah nasa takin a pui dawn a; history, philosophy, science leh humanity zir chiang turin a fuih a ni, tiin Ganesan chuan a sawi. Library-ah hian digital resource leh tunlai technology te dah tel a ṭul thu a sawi bawk a, zirna lama mamawh inthlak danglam zel phuhruk bakah, zirlaite chu zirna lam chauh ni loin, finna leh mimal hmasawnna atan pawh library chu hmang turin a fuih.