Meghalaya : KSU-in NEIGRIHMS hnathawk lak dan tih danglam phut

Khasi Students Union (KSU) chuan April 1 khan North Eastern Indira Gandhi Regional Institute of Health and Medical Sciences (NEIGRIHMS)ah point 10 awmna charter of demand an thehlut a, institute-a hnathawk lak dan tih danglam vat an phut.

NEIGRIHMS Director hnena lehkha an thawnah, KSU Employment Cell chairman Reuben Najiar chuan hna lak chungchangah leilung fate dikna chanvo humhalh a ṭul thu a sawi. Tuna recruitment advertisement an neih mek chu chinfel a nih hma chuan ti tawp turin an ngen a ni.

KSU thil phut zingah hian hna lakna tura kum bithliah, kum 30 chin tih chu kum 35-a sawn leh an phut. Najiar chuan administration thutlukna chu thil dik lo leh awmze nei lo tiin a sawisel. Union chuan nursing staff chungchanga thil dik lo awmte tarlangin, kum 2023-a recruitment process-ah nurse mipa 175 leh nurse hmeichhia 19 chauh thlan an nih thu a sawi. Nursing officer atan mipa leh hmeichhia ratio 20:80 an phut a, hei hi AIIMS-a an kalpui dan ang a ni.

Mipa nurse lakah hian Union chuan complaint chhiar sen loh a dawng a, an hnathawhah pawh thiam lo tak tak niin, damlote nunna atana hlauhawm tak an ni bawk, tiin Najiar chuan a sawi.

Zirlai pawl thil phut dangah hian khum 50 awmna hmun chauh ni lo, OMR hmanga offline recruitment lama inthlak te, reservation policy thlirlet, Meghalaya OBC list awm lohna Group B leh C position-a OBC reservation tih tawp te a ni. KSU chuan an thil phutte hi chinfel a nih loh chuan kawng danga hma lak zel an tum thu an sawi bawk.