Arunachal Pradesh : Police-te chawimawina hlan

Arunachal Pradesh home minister Mama Natung kaihhruaia inkhawm buatsaihah, state chhunga ruihhlo dona leh kawng hrang hranga an hnathawh ṭhat avangin police officer 25 chawimawina hlan an ni. SDPO Kengo Dirchi leh IPS officer SP Rohit Rajbir Singh te chu ruihhlo zuartu lian tak Rohit Basumatory man theihna tura operation hlawhtling takah an chanvo pawimawh an hlen avangin chawimawina dawng zingah an tel.

Minister Natung chuan, "Kan police officer-te’n dan leh thupek vawnhimna, a bik takin ruihhlo dona kawnga an thawhrimna hi a fakawm tak zet a ni" tiin, an hmalakna hrang hranga Director General of Police Anand Mohan kaihhruaina avangin lawmthu a sawi bawk.

He chawimawina hi an thawhrimna, ruihhlo tih tlemna, Chief Minister Helpline-a complaint a hun taka chinfel, mahni intihhlum venna kawnga hmalakna, leh technical investigation support kawnga an thawh ṭhat avangin officer hi hlan an ni. November 2023-a Operation Dawn ṭan a nih hnuah rahchhuah ropui tak awmin, case 354 ziahluh a ni a, mi 534 man an nih bakah ruihhlo kg 9,557, Rs vbc 38 hu man a ni tawh bawk.

Kum 2019 aṭang khan Arunachal hian ruihhlo dona beihpui thlakna chak zawkin a kalpui a ni. Thubuai ziahluh 1,452 awm tawhin, mi 2,619 man an ni tawh bawk. Thuneitute chuan psychotropic substance kg 18,600, Rs vbc 75 man hu an man a, dan loa opium chinna acre 56,000 chuang leh ganja huan acre 1,723-a zau an tichhe tawh bawk a ni.

Natung chuan enforcement hmalaknate chhunzawm zel tura roreltute inpekna a sawi uar hle a, Arunachal Pradesh chu ruihhlo laka fihlimna leh dan bawhchhiatna awm lohna hmuna din tumna kawngah thawhrimna famkim nen kalpui a nih tur thu a sawi.