Manipur : Dan loa lung laihchhuah thubuaiah mi panga man

Manipur police-te chuan Thoubal District-a Lungthar khuaah phalna nei loa lung laihnaa inhnamhnawih mi panga an man. Lirthei awm eng emaw zat an man bawk a, chung zingah chuan Tata Dumper Hyva truck pathum leh JCB pakhat pawh telin, helai hmuna dan loa lung laihchhuah hna thawh chu an titawp ta a ni.

Tualchhung thuneitute chuan dan loa lung laih hna hi hun rei tak chhung helai hmunah hian kalpui a lo ni tawh a, boruak chhiatna nasa tak a thlen thu an sawi bawk. Police-te chuan chhuichianna nei chhunzawm zelin, dan loa lung laihnaa inhnamhnawih hriatchhuahna kawngah nasa takin hma an la mek bawk.

Hetih lai hian venhimna leh muanna a awm theihna turin security force-te pawhin theihtawp an chhuah zel bawk. April 2-a Manipur-a tlang leh phai district-a hmun hrang hranga beihpui an thlaknaah Churachandpur district-a Mollum khua leh a chhehvelah Baofeng handheld radio set pahnih leh bulletproof (BP) jacket pakhat, protective plate nei an man.