Meghalaya : JSU-te'n Jaintia Hills-a MPSC exam neih phut

Jaintia Students Union (JSU) chuan Meghalaya sorkar chu Jaintia Hills-ah Meghalaya Public Service Commission (MPSC) exam centre din turin an ngen.

JSU-in deputy chief minister Sniawbhalang Dhar hnena lehkha an thawnah, East leh West Jaintia Hills hmun hla tak tak aṭanga zirlaite'n MPSC exam tura Shillong an panna kawnga harsatna an tawh dante a tarlang. Examna hmun an panna kawng chuan hunrei tak a daih thu leh, sum lama harsatna an tawh dan te an sawi bawk.

Traffic tawt tak vangin exam turte a tikhawtlai fo a, zirlaiten exam centre a hun takah an thlen theih loh phah a, a tlaite chu luh phalsak ni loin, ṭul lo taka zirlaite rilru hahna leh hun remchang hlohna a thlen a ni, tiin lehkhathawnah chuan an tarlang.

Jaintia Hills-a zirlai tam tak chu sum leh pai lama harsat neite an ni a, Shillong-a zin chhuahna senso, inkalpawhna, ei leh in, leh riahna te chuan phurrit lian tak a siam a ni, tiin an sawi bawk. Jaintia Hills aṭang hian exam tum hi tam tak awm ṭhin mah se, exam centre a awm loh avangin exam centre awmna district dang aṭanga zirlai te nena khaikhinin harsatna an tawk nasa hle a ni.

JSU chuan he thu hi Education Minister leh thuneitu dangte hnenah vawi tam tak an thlen tawh thu sawiin, district chhunga exam centre din tur hian hmalakna mumal tak a la awm lo tih an sawi. Jowai-ah MPSC Cell office a awm laiin, exam centre a awm loh avangin awmzia a la nei tlem hle tih an tarlang. Hetiang a nih avang hian JSU chuan sorkar leh MPSC chu Jaintia Hills-a exam centre din a nih theih nan hma la vat turin an phut.