Manipur

Manipur chief minis­ter N Biren Singh chuan state sorkarin 'School Faga­thansi Mission' a siam chu Nilaini khan sorkar school pangaah a hawng. 

He mission hi state chhunga sorkar school-te chawikanna tura duan niin, January 18 khan hawn a ni. School Fagathansi Mission hnuaiah hian sorkar school-te tihhmasawn a, zirlai tam zawk an hip theihna turin infra­structure ṭha zawka thuam leh, thawktu pawh indaih tawk tak dah tum an ni. 

Mission thawh khat­na kalpuina tur hian assembly constituency 60-a school pakhat 

ṭheuh chu model school atan thlan chhuah an ni a, heng school thlan chhuahte hi a enkawlna kawngah in ang tlang veka kalpui an ni ang. 

CM Singh chuan School Fagathansi Mission atan hian sorkar chuan state budget-ah pawh sum ṭhahnem tak a dah tih sawiin, Revised Estimate (RE) ah cheng vaibelchhe 43 leh, Budget Estimate-ah cheng vaibelchhe 25 dah a ni, a ti. He mission hmang hian sorkar school-ah zirlai tam zawk hip luh a ni dawn tih a sawi. State chhunga zirna kalpui dan chu thlak a ngai tih sawiin, CM chuan sorkar hna ringawt beisei tura zirlaite chherchhuah aiin, thiamna tak tak nei a, khua leh tui rintlak leh hna siamtu zawk nia zirtir chhoh an ngai tih a sawi.