Manipur: BJP-in committee din

Manipur-a Bharatiya Janata Party (BJP) chuan state chhunga delimitation kalpui mek enfiah turin member 13 awmna committee din a rel tih senior party MLA Kh Ibomcha chuan April 3, Ningani khan a puang. Committee-ah hian MLA 12 leh party state unit office bearer member pakhat an tel dawn a ni.

BJP-in delimitation hi dodalna a neih loh thu sawiin, Ibomcha chuan chhiarpui dik tak aṭanga siam a nih tur thu a sawi. Party chuan kum 2001 census-ah thil dik lo a tam tak a awm tih a sawi bawk.

Thawhlehni khan Manipur BJP MLA-te chuan delimitation kalpui a nih hmain kum 2001 Census ennawn leh National Register of Citizens (NRC) kalpui an lo phut tawh a, an thil phut hi political party dang 13-te'n ngenna an siam hnua ruahman a ni. Sorkar laipui chu census data-a tihsual awmte siamṭhat a nih hma chuan he thil hi ti khawtlai turin an ngen.

Supreme Court chuan March 17 khan sorkar laipui chu Arunachal Pradesh, Nagaland, Manipur, leh Assam-a delimitation nei turin thla thum hun a pe a ni. Mahse, sorkar laipui chuan court-ah Arunachal Pradesh leh Nagaland chungchang kalpui mek a nih lai leh, Manipur-a hnam inkara buaina thleng mek chuan he kalphung hman hi a remchang lo tih a hriattir.