Meghalaya: South West Garo Hills-a zirlai 925-in digital learning tablet dawng

Meghalaya-a South West Garo Hills-a school 13 aṭanga Class XI zirlai 925-te chuan Chief Minister’s Students Digital Learning Aid (M-TAB) hmalakna hnuaiah lehkha zirna atana hman chi tablet an dawng. Tablet semna hun hi Ningani khan Ampati DRDA Hall, Deputy Commissioner Office-ah neih a ni a, Mahendraganj MLA Sanjay Sangma chu khuallian a ni.

District Administration leh Education Department buatsaihin he hmalakna hmang hian digital thiamna tih pun leh Meghalaya pumah zirna lam tih changtlun a tum a ni. MLA Sanjay Sangma chuan zirna lama technology pawimawhna a sawilang a, sorkarin e-learning chu curriculum-a telh a tum thu sawiin, digital hman thiam a pawimawh thu a sawi bawk. Digital resource-in ṭhatna a neih rualin, zirlaite a ṭha lo lam zawnga in tihbuai tir lo turin a chah.

Deputy Commissioner Hema Nayak chuan state-in zirna tih chakna tura hmalakna a kalpui mek chu a fak hle a, tun hnaia hmalakna hrang hrang - CM Impact booklet sem leh zirlaiten kum khatah vawi hnih Secondary School Leaving Certificate (SSLC) exam an enchhin theihna turte a tarlang. Heng hmalaknate hian exam hlawhchham vanga zirlaiten kum khat an hloh loh nan a pui tih a sawi bawk.

District School Education Officer (SEO), Tapos Marak chuan SSLC leh Higher Secondary School Leaving Certificate (HSSLC) result-a harsatna a tawhte tarlangin, zirlaite chu an zirna lama an hlawhtlinna turin digital learning tools ṭha taka hmang turin a chah.