Meghalaya: Shillong Airport zauhna tur tender ti chhuak

Airports Authority of India chuan Shillong Airport zauhna tur Rs vbc 119 tender a ti chhuak a, hei bakah hian runway chu km 2.4-a ti zauiin thlawhtheihna lian zawk thlawh tir theihna tura siam a ni dawn niin official-te chuan Inrinni khan an sawi.

Chief minister Conrad K Sangma chuan thla 18 chhunga zawh tura ruahman he project hi Meghalaya mipuite tan hmasawnna ropui tak a nih tur thu a sawi. Tender tih chhuah tarlan danin, airport tih zauhna tur huam chhungah hian runway awmsa chu metre 571-a sei a ni a, hei hian Shillong-a A-320-type aircraft thlawh tir a awlsam phah dawn a ni.

Expansion project hian terminal building leh apron tih zauh a huam bawk a, a kaihhnawih infrastructure hna hrang hrang pawh a huam tel bawk. Mega project senso tur ruahman chu Rs vbc 119.44 niin, thla 18 chhunga zawh fel hman tura beisei a ni.

Air connectivity tih changtlun chu nun ti danglamtu, tourism tih hmasawn, investment hipna, leh ṭhalaite tan hun remchang a siam a ni, tiin CM Sangma chuan a sawi. Meghalaya tan lungawina leh beiseina ropui tak a nih thu sawiin, Shillong Airport tih zauh nana tender tih chhuah hi kum eng emaw zat kalta chhunga an thawhrimna rah chhuah a nih thu a sawi bawk.

Tourism minister Paul Lyngdoh pawhin state sorkarin tourism circuit thar siam leh awmsa ti changtlunna turin Rs vbc 4,000 chuang a tiam tih a sawi. Kum 2024 December thla khan sorkar chuan Shillong Ropeway Project lungphum a phum a, hei hi state-a passenger ropeway hmasa ber tur niin, Shillong-a tourist leh cultural landmark langsar tak takte thlunzawm tum a ni a, khawpui chhunga lirthei tlan dan pawh tih hmasawn tum a ni bawk.