Assam : BJP kaihhruai NDA-in RHAC inthlanah seat 33 la

Assam chief minister Himanta Biswa Sarma chuan Inrinni khan BJP kaihhruai National Democratic Alliance (NDA) chuan Rabha Hasong Autonomous Council (RHAC) inthlanpuiah seat 36 aṭangin seat 33 an lak thu a sawi.

Congress chuan tribal council inthlanah hian seat pakhat chiah an la thei a, Bharatiya Janata Party (BJP) erawhin seat rukah hnehna an chang thung. Hei bakah hian a thawhpui, Rabha Hasong Jautho Sangraam Samiti (RHJSS) chuan seat 27 zet an la a, he inthlanah hian Independent candidate pahnih pawhin hnehna an chang.

RHAC Chief Executive Member (CEM) Tankeswar Rabha chuan No-7 South Dudhnoi council constituency a chuh hnuah hlawhtling takin term dang a la leh ta a ni. Rabha chuan vote 7,164 hmuin, vote 1,593 chauh hmu thei Congress candidate Sanjib Kumar Rabha a hneh.

Inthlanpuiah hian vote tla a ṭhahnem hle a, vote nei mi nuai 4.46 zinga 69% velin vote an thlak a ni. Assam-a Goalpara leh Kamrup district-a awm RHAC bial hrang hrangah vote thlak a ni. State Election Commission chuan result hnuhnung ber chu buatsaih mek a nih thu leh a hun takah puan a nih tur thu a sawi bawk.