Scho' dil hun October thla chhung pawtsei

Sorkar laipuia Ministry of Tribal Affairs chuan, scholarship dil theih hun chu kumin October thla chhung a pawtsei.

Hun pawhsei a nih avang hian Aizawl City College Joint Students’ Union (ACCJSU) chuan Ministry of Tribal Affairs leh Mizoram Scholarship Board (MSB) hotute chung-ah lawmthu an sawi.

MSB aṭanga thu dawn danin, ruahmanna hmasaah chuan, scholarship dil hi kumin September thla tawp thleng a ni a; mahse, Mizoram sorkar hotute leh MSB hotute'n hun pawtsei turin sorkar laipuiah an thlen a, Ministry of Tribal Affairs chuan a pawtsei leh ta a ni.

Scholarship dil hun pawhsei a nih chung-changah hian ACCJSU hruaitute chuan nimin khan Aizawl Press Club-ah thuthar thehdarhtute an kâwm.

Scholarship dilna thehluh hun tawp, September 30, 2016 thlengin Mizo zirlaite tam takin dilna an la thehluh hman loh vanga an ngenna ngai pawimawha Mizoram sorkar leh MSB hotute'n dilna thehluh theih hun pawtsei leh tura sorkar laipuia an ngenna tihhlawhtlin a nih avangin an lawm tak zet thu an sawi.

ACCJSU president Zodinsanga chuan, scholarship chu internet (online) hmang chauha dil theih a ni tawh a, scholarship dilna form (online portal) an thlâk zin avang leh Mizoramah internet a ṭhat tawk loh avangin zirlai tak takin harsatna an tâwk tih a sawi a, "Mizo zirlait zingah scholarship form online-a la thehlut hman lo college/institution tinah ṭhahnem tak an la awm mek a ni," a ti.