MSCP MLA panga an fihlim

Manipur Legislative Assembly Speaker Th. Lokeswar chuan Manipur State Congress Party (MSCP) chhuahsan a, Indian National Congress (INC) zawmtu MLA panga te disqualify tura ngenna chu Tribunal-in a hnawl tih a sawi.

MSCP vice president hlui Adim Panmei chuan heng MLA pangate hian '10th Schedule of the Constitution' an bawhchhia nia sawiin, kum 2014 April khan an lakah petition a ziaklut a ni. Mahse Speaker Th. Lokeswar chuan Tribunal-in ngun taka a ngaihtuah hnuah, MLA pangate chu disqualify an nihna chhan tur a hmu lo niin a sawi. MLA panga disqualify tura tihte hi - Paonam Brojen, RK Imo, Nemcha Kipgen, Karam Thamarjit leh Janghemlung Panmei te an ni a, state assembly election hnuhnung bera thlan tlin te an ni. Petition thehluttu, Adim Panmei pawh hian nikum khan BJP a zawm a ni.

MSCP hi Manipur chief minister hlui W. Nipamacha kaihhruaina hnuaia din a ni a, Congress aṭanga inla hrang an ni. Election Commission of India chuan June 2015 khan regional party-ah a pawm a ni. State Trinamool Congress MLA palite chuan tun hnai khan INC zawmin, rorel lai Congress party chuan MLA 51 a nei mek a ni. Manipur Assembly-ah hian member 60 an awm mek a, nakkum hian inthlan an hmachhawn ang.