Assam Court-ah Rahul inlan

Congress vice president Rahul Gandhi chu Ningani khan Guwahati-a Chief Judicial Magis-trate (CJM) court-ah mi tihhming-chhiat thubuaiah a inlan.

Rahul Gandhi chuan, “RSS-te hian an duh chuan ka lakah thubuai an ziaklut thei ngei alawm, mahse chu chu ka tan chuan malsawmna zawk a ni" tiin Court-a a inlan hnuah a sawi. RSS-te chu India ṭhendarh tumah puhin, a thlawp loh thu a sawi a, retheihna umbo turte leh hmasawnna hna thawk turin ke a pen zel dawn tih a sawi. Rahul chuan BJP chu bei zuiin, ni 30 chama Uttar Pradseh-a loneitute tlawh tura a ruahman chu BJP lamin harsatna thlen tumin an hmanhlel hle a ni, a ti.

Rahul Gandhi chuan December 12 2015 khan Assam tlawhin, Vaishnavite monastery tlawh a tum chu RSS-te chuan harsatna an lo siam niin a sawi. New Delhi a let hnuah Rahul chuan media hmaah, RSS-te chuan Satra a tlawh tur chu lo dangin, an hmeichhiate chu min dang turin an lo tawktarh a ni, a ti. He a thusawi hi RSS lam chuan an helh hle a, Rahul-a thusawi chu in tihhmingchhiat tumna a ni tiin, RSS volunteer Anjan Bora chuan Gandhi lakah hian thubuai a ziaklut ta a ni.

Rahul hi Chief Judicial Magis-trate (CJM) Kamrup hmaah inlanin, Court-a a inlan hnu hian Assam Pradesh Congress Committee (APCC)-te chu meeting a neihpui zui a ni. Congress Vice President Rahul Gandhi hi November 5-ah Court-ah inlan leh tura tih a ni.