Surgical Strike : IAF-in AP-a ALG thuamtha dawn

Pakistan-occupied Kashmir-a India sipaiten hel an luh chhuah avanga India leh Pakis-tan inkara boruak duhawm lo inlum mek chuan ngawng nei zelin, Indian Air Force chuan Arunachal Pradesh-a an hmun te chu kawng hrang hranga thuam ṭhat a nih tur thu a puang.

IAF Eastern Air Command chief Hari Kumar chuan AP-a advanced landing grounds (ALGs) pasarihte chu kawng hrang hrangain thuamṭhat an ni dawn tih Inrinni khan a sawi. Hari Kumar chuan, AP-ah hian ALG pasarih awmin, panga chu hman theiha hawn a ni tawh tih a sawi a, adang pahnih pawh hawn theih tura peih fel thuai tum a ni, a ti. Ralthuam tihchakna turin, MiG 27 leh Hawks squadron-te nghaihtuah belh mek a ni a, Rafale lei turin inremna pawh siam a nih tawh tih Kumar chuan a sawi.

Eastern Air Command chief chuan, Pakistan chuan hel a khawi ngam nia sawiin, ramriah sipai tam zawk a dah theih loh avangin, pawikhawihna thlen turin helte chu a chettir ṭhin a ni, a ti. Ram pahnihte chuan engti kawng zawng mahin indo an duh lo tih a sawi a, indo chu tu tan mah a ṭha lo a ni, a ti. Chutih rualin, kan sipaite thah an nih chuan a ṭul dan anga chet lak ve a ngaih thu a sawi. Hmar-chhak chu ramri depa awm a nih avangin kawng hrang hrangah ngaihpawimawh a ngai tih sawiin, hmarchhak huam chhunga advanced landing grounds (ALGs)-te chu ṭhuam-
ṭhat mek zel an nih thu IAF Eastern Air Command chief Hari Kumar chuan a sawi bawk.

Hetihlai hian Manipur rights activist Irom Sharmila chuan, ram pahnihte inkarah boruak muanawm tak a awm a duh thu Inrinni khan a sawi. Sharmila chuan, India leh Pakistan-ah Hindu leh Muslim sakhaw zuitute tam tak an awm a, ram pahihte chu indo thei an ni lo, a ti. Prime minister ni ila chuan, "mipuite chu inbengdai tur leh indo chungchang sawi ri lo turin ka ngen ang" a ti. India ram chu hnam hrang hrang leh sakhaw hrang hrang zuitute awm khawmna a nih avangin, India danpui pawh a khat tawka siam ṭhat ngai reng a ni, a ti. Mipuite awmna mil zela dan chu siam rem ngai niin a sawi bawk.

Mipui leh media-te chuan India leh Pakistan chung-changah a ngaihdan an zawt fo tih sawiin, "Tharum thawhna chuan buaina a chingfel dawn lo a, inbiakna hmanga chinfel theih a ni" tia a chan ṭhin thu a sawi.

Hetih lai vek hian Meghalaya Chief Minister Mukul Sangma chuan BJP kaihhruai NDA sorkar chu Pakistan ram chhunga mi chauh nilo hmar-chhak huam chhunga, Myanmarleh Bangladesh ramria helte lakah beihpui thlak ve turin a lo ngen ve mek bawk. Sangma chuan, international boundary-a helte laka beihpui thka chu state sorkar tih tur a nih loh thu sawiin, sorkar laipui chu hma la turin a ngen tih a sawi. Indian Army-te chuan Line of Control (LoC)-ah helte lakah beihpui thlak ve a duh thu Meghalaya Chief Minister chuan uar takin a sawi a ni.