Nagaland leh Meghalaya-ah Covid-19 kai hmuh a ni

Nagaland mi Covid-19 kai pakhat hmuh a nih thu state sorkar offi cial chuan nimin khan a tarlang. Dimapur-a private hospital-a dam lo enkawl pakhat chu Covid-19 symptom a neih avangin Guwahati Medical College Hospital-ah kal tir a ni a, test neih a nih hnuin coronavirus hi a kai tih fi nfi ah a ni ta a ni.

Covid-19 a kai tih fi nfi ah a nih hnu in Nagaland sorkar chuan he dam lo chenna bial leh, Dimapur-a a lo awm tawh na hospital-te chu kharkhip nghal a ni tih a sawi a, Kohima-a hmun eng emaw zat kharkhip zui a ni bawk. Meghalaya-ah pawh nimin khan doctor pakhat chu Covid-19 a kai tih hriat a ni a, an state a he hri kai hmuh hmasak ber a ni. Health and family welfare minister Al Hek chuan hri kai hmuh a nih thu hi nemnghetin, chief minister Conrad Sangma nen pawh an sawidun nghal thu a sawi.

He doctor thawhna hospital-a damlo awm mekte chu hospital compound chhuahsan tir lo turin Commissioner leh Health Department Secretary te pawh hriattir an ni, a ti. Covid-19 kai doctor thawhna hospi tal chu quarantine camp atan hman nghal a ni a, hospital staff, doctor chhungte leh hospital tlawhtute pawh test vek an ni dawn tih a sawi.

Assam-ah hri kai 30 awm tawh Assam health minister Himanta Biswa Sarma chuan nimin khan an state-ah Covid-19 kai pakhat hmuh belh a nih thu a sawi a, Assam-ah hri kai hi mi 30 an awm ta a ni. Nimina hri kai hmuh thar pawh hi Delhi-a Nizamuddin Markaz-a Tablighi Jamaat meet-a tel a nih thu minister chuan a sawi. Assam-a hri kai hmuh tawh zinga 29-te hi Tablighi Jamaat inkhawmpui nena inhnamhnawihna nei vek a ni a, pakhat erawh chu a kaina tak hriatchian a la ni lo.

Assam sorkar hian lockdown avanga state danga inenkawl tura kal tangkhang mek, cancer, lung leh kal thlak ngaite chu ṭanpuina, Rs 25,000 ṭheuh a pe dawn. State health and family welfare minister Pijush Hazarika chuan heng damlo ṭhenkhatte hian sorkar puihnate an rawn dil thu sawiin, state hrang hrangah damlo tangkhang mek hi eng emaw zat an awm a ni, a ti.