BSNL-in Assam-ah internet chak ṭha zawk pek tum

Bharat Sanchar Nigam Limited (BSNL) chuan Assam-a mobile Internet service tichak turin hma a la mek a, hmun hrang hranga Wi-Fi hotspot-ahte 100Mbps pe chhuak thei turin ruahmanna a kalpui mek.

BSNL, Assam circle chief general manager M.K. Seth chuan, BSNL chuan tun hnaiah Kamakhya temple-ah Wi-Fi hotspot a hawn belh a, customer-te tan access point 60,000 neih tumin hma a la mek a ni, a ti. BSNL hian state sorkar chu thawhpuiin, e-education, e-health, e-agriculture leh e-transport service kalpui a nih theihna turin kawng hrangin ruahmanna an siam a ni. Hei mai bakah hian BSNL chuan hmun kilkhawr zawkah National Optical Fibre Network project a kalpui mek bawk. Hemi hmang hian state chhunga panchayat zawng zawng chu thlunzawm vek tum a ni. Deparment, bank leh chekpost-te'n data lian tham an transfer zung zung theihna tur ruahman a ni bawk tih M.K. Seth chuan a sawi.

Assam-ah hian railway station zawng zawngah wifi dah vek tumin state sorkar chuan hma a la mek bawk.