Irom Sharmila-i'n Modi hmu duh

Manipur rights activist Irom Sharmila-i chuan Delhi Chief Minister Arvind Kejriwal a hmuh hnuah, Prime Minister Narendra Modi chu hmuh a, a hnen aṭanga thurawn lak a duh thu a sawi.

Sharmila-i hian September 26 khan Delhi Chief Minister Arvind Kejriwal chu a lo hmu tawh a, a hnen aṭang hian thurawn eng emaw zat a dawng tih a sawi. Modi hmuh leh a duh thu sawiin, a hnen aṭanga thurawn ṭha tak tak dawn a beisei a ni. Chawnghei a bansan hnua politics luhchilh tumtu, Sharmila-i chuan politics-ah hian tawnhriat ngah zawkte hnena aṭanga thurawn lak a ngaij chang a awm fo a ni, a ti. Sharmila hian a hma pawhin Armed Forces (Special Powers) Act (AFSPA) hlih a nih theih nana hmalakpui turin Modi chu hmuh a duh thu a lo sawi tawh bawk.

Kar kalta Zirtawpni khan North East Forum for International Solidarity (NEFIS) buatsaihin, Delhi University-ah Manipur tana zalenna sualtu Hijam Irabot piancham vawi 120-na pualin hun hman a ni a, he hunah hian Sharmila-i chu thusawi tura sawm a ni. Zirlai kalkhawmte chu khua leh tui ṭha ni tura fuihin, inpumkhatna leh inunauna siamtu ni tura a duh thu a sawi. Zirlai kalkhawmte chu Armed Forces (Special Powers) Act hlih a nih theih nana hmalakna te thlawp zel turin a sawm bawk a ni.

Kumin August 9 khan kum 16 chhung zet AFSPA hlih a nih theih nana chawnghei a kalpui tawh chu tawpsanin, Manipur state assembly election-ah independent-a ding turin Sharmila-i hian hma a la mek a ni. Party eng emaw zat chuan an party ticket-a ding turin an sawm a, mahse Sharmial chuan Independent-a din a duh thu a sawi.