Assam : Jorhat-Dibrugarh NH project December 31 hmaa zawh hman tum

Assam chief minister Himanta Biswa Sarma chuan April 8 khan National Highway, Jorhat-Dibrugarh section chu Lok Sabha inthlanpui neih leh hmain December 31, 2025-ah zawh hman a nih tur thu a puang.

April 7-a New Delhi National Highways and Infrastructure Development Corporation Limited (NHIDCL) managing director, Dr. Krishan Kumar nen high-level meeting an neih hnuah CM hian a official X-ah he thu hi tarlangin, mipuite hnena an thutiam chu hlen chhuah a ni leh dawn ta a ni, a ti.

Meeting-ah hian CM leh NHIDCL hotu Dr Kumar chuan Assam-a infrastructure tih hmasawnna kawnga hmalakna kal mek leh rawtna awmte an zirchiang a; project pawimawh thlirlet zingah hian km 19.28-a thui, Brahmaputra lui chunga four-lane lei dawh tur pawh a tel. Hei hian Assam-a Dhubri leh Meghalaya-a Phulbari a thlunzawm dawn a ni. Dawh zawh a nih hunah chuan India rama lei sei ber a ni tawh dawn a ni.

Hruaitu pahnihte hian Rs vbc 25,000 senga siam tura ruahman, Guwahati - Silchar Expressway chungchang pawh an sawi dun bawk.

Infrastructure project pawimawh an sawi dun zingah hian Numaligarh - Gohpur underwater tunnel, hmarchhaka hmasa ber tur siam tur leh Baihata Chariali - Tezpur leh Gohpur - Kulajan inkar national highway corridor tih zauhte pawh a tel.