Meghalaya : CM-in hmarchhak tourism task force meeting kaihruai

Meghalaya chief minister Conrad K Sangma chuan April 7, Thawhṭanni khan High-Level Task Force on Tourism for North East India meeting hmasa ber a kaihruai.

Task force hi November 2024-a Agartala North Eastern Council plenary session vawi 72-na neih zawh hnua din a ni a, CM Sangma chuan he hmalakna hi hmarchhak biala tourism sector tan thil chhinchhiahtlak a nih thu a sawi.Hmarchhak state-te chuan progressive industrial policy hmangin lungphum an phum tawh tih a sawi bawk.

Task force-in rawtna a siamte hmangin nakin lawka investment leh strategy hrang hrang siam a ni ang a, India rama tourism destination hmahruaituah hmarchhak bial hi a siam theih beisei thu Sangma chuan a tarlang.

CM Sangma chuan India ram leh khawvel pum huap khualzinte chuan hmarchhak bial chu pakhat anga an hriat thu sawiin, tourism awlsam zawka kalpui a nih theih nan state hrang hrangte chuan thawh hona ṭha tak neih a pawimawh thu a sawi bawk.

Ministry of DoNER-in Ministry of Tourism nen ṭangkawpin a din, task force hi hmarchhak biala tourism tih hmasawn nan roadmap kimchang tak siam tura din a ni. A mawhphurhnate chu state pariat-a tourism circuit hriatchhuah, ruahmanna ṭha tak rawt te, leh helai bial nena inmil tura international model hlawhtling tak takte siamrem a ni.

Tripura chief minister Manik Saha chuan an state-in tualchhung ei leh in leh culture tih hmasawn tura hma an lak mek dante sawiin, Sikkim chief minister Prem Singh Tamang chuan state hrang hrangah branding leh marketing mumal tak neih a ṭul thu a sawi bawk.