Assam 2030 : Retheihna umbo a ni ang : CM

Assam sorkar chuan hma-chhawp lian tak neiin, kum 2030-ah chuan mi rethei leh rilṭam, eitur nei lo awm lohna leh, mipuite ziak leh chhiar thiam vekna state an nih tur thu Assam Chief Minister Sarbananda Sonowal chuan a puang.

Thawhṭannni khan Chief Minister Sarbananda Sonowal chuan ‘Assam 2030: Our Dream, Our Commitment’ tih chu tlangzarhin, state sorkarin hmachhawp mumal tak a siam thu a sawi. Sonowal chuan, state sorkar chuan kum khat chhungin retheihna chu 27.3%-ah tihniam turin hma a la dawn a, kum 2030-ah chuan retheihna umbo a ni ang, a ti. Thlai tharchhuah a leta tipung turin hma lak a ni dawn a, kut hnathawka eizawngte chu chawisan an ni dawn tih a sawi. Zirna chu state sorkar ngaih pawimawh ber zinga mi a ni a, tun aṭanga kum 13-14-ah chuan mihring ziak leh chhiar thiam vek awmna state-ah puan a ni ang, a ti.

Mipa leh hmeichhiate inkarah intluktlanna a awm zel theih nan hma lak a ni dawn tih Chief Minister chuan sawiin, zirna chu intluktlanna a awm theih nana pawimawh ber a nih thu a sawi. Naupiang kum tling lo chunga thihna thleng ṭhin chu tihbo tumin hmalak lak a nih tur thu a sawi bawk. State economy chawikan chu an ngaih pawimawh thu sawiin, kum tin a tlem berah Gross domestic product (GDP) chu 7% ah tihpun tum a ni a, Industry din kawngah nasa zawka hma lak a nih tur thu a sawi bawk.

‘Assam 2030: Our Dream, Our Commitment’ document-ah hian sustainable development goal 17 duan niin, kum 15 chhunga tihhlawhtlin tur target 169 siam a ni bawk.