Manipur-ah Congress sorkar a chak tawk lo - Prakash Javadekar

Union Human Resource Development Minister Prakash Java-dekar chuan Thawhṭanni khan ni hnih chamin Manipur a tlawh a, Congress kaihhruai sorkar chu hmasawnna hna thawk turin a chak tawk lo tih a sawi.

Javedkar chuan Manipur-a Congress kaih-hruai sorkar hnuaiah sports university din chu thil theih loh niin a sawi a, Natiaonal Highway 37 pawh chei ṭhat a ni lo ang a ti. Congress sorkar chu hmasawnna hna thawk tak tak tura inpumkhat tawk lo leh chak tawk lo niin a sawi. Chief Minister Okram Ibobi Singh chu sports university din a nih lawk loh chhanah mawhphurtu niin a sawi a, state sorkar chuan a hmun tur a ruahman fel thei lo a ni, a ti. Sports University dinna tur hian state sorkar chuan ram ruahman ve bawk mah se, ram neitute chu Court-ah an zualko ṭhin avangin, a dinna tur ram hi tun thlengin ruahman fel a la ni lo nia tarlan a ni.

Hetih lai hian, Prime Minister Narendra Modi chuan Manipur-a NH 37 chu ni 100 ral hmaa cheiṭhat a nih tur thu a lo sawi tawh nia tarlan a ni. Hemi chungchang hi Javedkar chuan sawiin, "Tender chhuah ni tawh mah se, state sorkar aṭanga thlawpna kan hmuh ṭhat loh avangin hna thawh theih a ni lo" a ti. Sorkar laipui chuan Manipur state chhunga NH 37 chhe lutuk chu chei ṭhat a duh tih sawiin, Assam state huamchhunga NH 37 chu India rama a
ṭha ber pawl a nih thu a sawi. High-level team chuan Manipur an tlawh thuai dawn tih sawiin, Manipur-a Congress sorkar-ah sorkar laipui chuan rinna a nghat ngam lo niin Union minister chuan a sawi bawk.

Union Human Re-source Development Minister Prakash Java-dekar chuan chuan ni 15 danah hmasawnna hnathawh thlitlai tura Imphal a kal
ṭhin tur thu a sawi.