Tura-ah mipui lungawi loten kawng zawh

Meghalaya-a Tura Kendriya Vidyalaya-a zirrtirtu pahnih Yogesh Joshi leh Deepjyoti Das-te chu September thla khan pawngsual thu buaiah man an ni a, an zirlai naupang pawngsualah puh an ni. He thil thleng duh lohna lan tir hian pawl hrang hrangte chuan Thawhlehni khan Tura-ah kawng an zawh.

Kawngzawhte chuan Yogesh Joshi leh Deepjyoti Das-te chu an phu ang ngeia hremna pek an phut a, anni bakah hian zirlai naupang lungawi loten School gate an khar laia hruai chhuaktu CRPF commandant R K Behara chu hrem an phut bawk. Joshi leh Das-te hi man an ni tawh a, police custody-ah dah an ni. South Tura MLA John Leslee K. Sangma chuan lungawi lohna kawngzawh hi tel puiin, zirlai naupang chunga thil thleng chu a dem tak zet thu a sawi. Zirlai pawngsual-a puh zirtirtu leh CRPF commandant-te chu hremna pek ngei a phut thu a sawi.

Kawngzawhnaa thusawitute chuan CRPF commandant R K Behara chet dan chu pawmzam mai theih a nih loh thu an sawi. Zirlai naupang pawngsual tawk nu leh pate chuan Tura police station-ah FIR an thehlut a ni. A’chik Youth Welfare Organisation (AYWO) general secretary Sengbath Marak chuan, thudik haichhuah a nih hma loh chuan lungawi lohna an lan tir zel tur thu a sawi. Tura Bar Association pawhin pawngsualtua puhte hi bail-ah chhuah phalsak lo turin an ngen a, hei hi Federation of Khasi Jaintia and Garo People (FKJGP) president Pritam Marak pawhin an thlawp tih a sawi. Pawl hrang hrangte chuan Child Protection Cell din an duh thu an au chhuahpui bawk.

Tura Kendriya Vidyalaya-a prin-cipal in-charge Yogesh Joshi chuan pawl 12 zirlai hmeichhe pahnih chu a piancham lawm tura sawmin, an class mipa palite pawh a sawm tel. Hmeichhe pahnihte hi an inturah zu pawlhsak an ni a, hrai ruih an nih hnuah principal official quarters-ah hian pawngsual an ni zui ta nia tarlan a ni. Mawhphurtua puh Yogesh Joshi leh Deepjyoti Das-te hi school khata thawk an ni.