Sikkim-ah Khualzin tan Bike hawh theih

Sikkim transport department chuan tourism lama hmasawnna tur duangin, an state tlawhtu khualzin ten man chawia an hman theih tur bike hawh theih a tlangzarh.

Sikkim tlawhtuten hmun hrang hrang awlsam zawka an tlawh zung zung theihna turin, state transport department chuan bike hawh theih tur hi a ruahman a, a khalh thiam lo tan driver hman tur an awm bawk. State transport secretary S.B.S Bhaduria chuan, Royal Enfield bike 500cc panga chu BB Line Tours and Travels chuan an chhawp sak tih sawiin, a dang pawh ruahman belh zel a ni ang, a ti. Khualzinte hman tur bik atan hian registration plate pawh a hran siam a nih thu Bhaduria chuan a sawi.

BB Line Tours and Travels Manager Gelek Gyatso chuan, state trans-port department hmalaknaa khualzin tana hman tur bike ruahman a ni ta chu lawmawm a tih thu sawiin, khualzin tan a ṭangkai thei hle dawn a ni, a ti. Hei hian veivahna atana an sum khawral 60% vel zet chu a chhawk thei dawn a, khualzin pawh a hip belh ngei beisei a ni, a ti. Bike hawh man hi ni khatah Rs 1,500 a ni a, khualzinte chuan security deposit Rs 10,000 an pek a ngai thung. Security deposit hi tihchhiat palh thil thua invenna tura tih a ni a, a chhiat-na a awm lem loh chuan a ngaia pek let tura ruahman a ni, Gyatso chuan a ti bawk.

Ramchhung khualzin te chuan bike hmang turte hian driving licence an neih angai a, ram dang tan international driving licence bakah, Inner Line Permit a ngai a ni. State tourism department special secretary C.P. Dhakal chuan, permission chu Gangtok-a check-post office aṭanga pek chhuah a nih tur thu a sawi.