Meghalaya : CM in thingtlang khua tlawh

Meghalaya chief minister Conrad K. Sangma chuan April 9 khan East Khasi Hills-a thingtlang khua tlawh kualin, a kaihhruai sorkar chuan thingtlang lama hmasawnna a awm theih nan nasa takin hma a la tih a sawi. Thingtlang lam chawikan chu Meghalaya hmasawnna kawnga hmahruaitu a ni tih sawiin, tualchhung cooperative society leh self-help group-te nen inkawmna hun an hmang bawk.

Thingtlang lamah hmalakna tam tak awmin hmeichhia, ṭhalai, leh loneitute chu an pawimawh ber a ni, tiin Sangma chuan khawtlang inkhawmnaah mipuite a hrilh. Chief Minister hian thingtlang lama eizawnna chhawm nung thei, a bulṭhut aṭanga zirna in tihchakna tura sorkar hmalaknate a tarlang a ni.

Jatah khuaah chuan Integrated Village Cooperative Society chu tourism, agriculture, leh entrepreneurship lama thawhhona ṭha tak hmanga thingtlang economy hmasawnna atana entawn tlak tak a ni chu a fak hle. Hamṭhatna dawngtute chuan sorkar ṭanpuina hmanga economy ṭhanlenna chungchanga an thil tawn te an sawi a, tualchhung thil siamchhuah hlutna belhchhah turin processing unit siam tura puihna an dil bawk. Sangma chuan khawtlang nun ngelnghet tak siam turin stakeholder-te mawhphurhna insem a pawimawh thu a sawi.

Syntung khuaah Chief Minister chuan strawberry huan a endik a, tualchhung loneitu 115 an tel. Tunah hian Meghalaya-a strawberry chinna hi hectare 132a zau a ni tawh a, kum khatah MT 10 vel thar chhuakin, India rama strawberry thar chhuah zawng zawng 4% chuang a tling pha.

Sangma chuan fund pek turte puangin, heng zingah hian tualchhung band tana musical instrument leina tur Rs nuai 5, SHG office sakna tur Rs nuai 5, Syntung Upper Primary School tan cheng Rs 3 pawh a tel a, hei bakah hian healthcare facility-te a enfiah bawk.