Manipur: Naga MLA-in ramri infrastructure tihchangtlun phut

Manipur-a Phugyar assembly constituency MLA, Naga hruaitu Leishiyo Keishing chuan prime minister Narendra Modi kaihhruai sorkar laipui chu Manipur Kamjong district-a Indo-Myanmar ramri bula kawngpui infrastructure leh check post siamṭha turin a ngen.

MLA hian a ngenna hi Manipur tlawha zin, union minister of state (MoS) for defense Sanjay Seth hnenah ziakin a thlen a ni,

Union Minister hi Myanmar ramria Kamjong district-ah ni hnih chamin a zin a, Kamjong district hi sq km 2,400-a zau niin, Myanmar nen international ramri km 120-a thui an inṭawm. He district-ah hian khaw 126 awmin mihring 45,616 an cheng a ni.

Memorandum-ah hian Leishiyo Keishing chuan India sorkarin ramri aṭanga km 5 vela hlaah “Indo-Myanmar Friendship Road” a siam laiin, India ram lam kawngpui ṭha tawk lo a awm tih a sawi. Tualchhung mipuite tan inkalpawhna tih changtlun a ngai a, ramri venhimna ṭha tak neih a ngai tih a sawi. Minister chu Integrated Check Post (ICP) tam zawk din tura a ngen bakah, Kamjong K Ashang Khullen-ah model town siam a rawt bawk. MLA chuan memorandum-ah hian Indo-Myanmar ramri-ah ICP pahnih chauh a awm thu sawiin, Indo-Bangladesh ramri-ah ICP 24 a awm thu a tarlang.