Meghalaya: NEHU pro VC in banna theh lut

Prof Sherwin M Sungoh chuan North-Eastern Hill University (NEHU)-a Pro Vice Chancellor hna a chelh aṭanga ni 19 hnuah banna theh lutin, nawrna nasa tak a tawh thu leh thuneihna tlemte chauh pek a nih thu a sawi.

April 9-a banna lehkha a thehluhah Sungoh chuan, "Nawrna nasa tak hnuaiah Pro Vice-Chancellor hna thawh hi ka tan a harsa hle a ni,” a ti. Sungoh chuan a mawhphurhna hlen chhuahna kawngah administration lamah harsatna lian tak a awm thu sawiin, chung zingah chuan university headquarters aṭanga vice chancellor Prof Prabha Shankar Shukla a awm loh thu leh sum leh pai indaih lohna bakah thuneihna an pek tawk loh vang niin a sawi. . Heng harsatnate avang hian university enkawl a harsat thu a sawi bawk.

Pro Vice Chancellor a nihna aṭangin bang mah se, Sungoh hian university-ah Acting Vice Chancellor hna a chelh chhunzawm zel dawn a, senior-most professor a ni dawn a ni. Pro Vice Chancellor a ban leh tak avangin university kalphung pawh a la mumal thei dawn lo a, a bik takin thutlukna pawimawh, School Board rawtna siam la awmin, academic session thar atana zirlai admission kalpui dan tur chungchangah harsatna a awm thei dawn a ni. Sungoh chuan heng buaina hi chinfel thuai a ṭul thu sawiin, “Buaina awm mekte chu a tlai hmain inrem taka chinfel dan tur zawn chhuah a pawimawh hle a ni,” a ti.

NEHU hian court case chinfel loh, affiliation chungchanga buaina, leh zirna lamah buaina eng emaw zat a hmachhawn mek a, hruaitu nghet leh inkaihhruaina mumal tak an mamawh tawh hle a ni.