Manipur : Shiv Sena leh COCOMI-te'n President’s Rule sawisel

Manipur-a President’s Rule puan chu thla hnihna a ni tawh a, national political party leh regional civil society organization pawimawh tak aṭangin sawiselna nasa tak a tawk.

Shiv Sena Manipur unit leh Coordinating Committee on Manipur Integrity (COCOMI) chuan sorkar laipuiin state chhunga remna leh muanna a siam theih loh avangin an lungawi loh thu an sawi chhuak a, Shiv Sena Manipur state president M. Tombi chuan President’s Rule chu awmze nei lo tiin thuneitute chu hmalakna nei loah leh hnam inkara buaina kal mek ti tawp tura hmasawnna nei loah a puh. Tombi chuan union home minister Amit Shah-a’n Meitei khawtlang tana zalen taka kal theihna tura hmalakna a siam chu sawiselin, rah chhuah a la nei lo a ti. Kuki firfiakte chuan Governor-in ralthuam hlan tura a ngen nawn fo chu an dodal niin a sawi bawk.

Tun hnaia thil thleng, Supreme Court judge-in Churachandpur a tlawh chu Kuki-Zo community-in nasa taka an dodal leh Kangpokpi-a Superintendent of Police laka pawikhawihna thleng nia report te pawh sawilangin, heng dan bawhchhiatnaah hian hmalak a la nih loh thu a sawi.

Tombi chuan Manipur Legislative Assembly-ah BJP-in majority nei mah se, state-a MLA-te'n mipui sorkar an siam thei lo chu a sawisel a, democratic principle leh mipui rinna phatsanna a nih thu a tarlang.

COCOMI convenor Khuraijam Athouba pawhin sorkar laipui chu Manipur buaina chungchangah thu dik lo thehdarhtuah a puh a, tlangdunga chengten harsatna an tawh chhunzawm zel thu leh, an zinga tam tak chuan ram an chan a, an dikna chanvo leh eizawnna bulpui an hloh a ni, a ti. Athouba chuan union home minister Amit Shah-a'n buaina a tawp tawh nia a sawi chu hnialin, silai hmehpuah tih tlem ni mah se, boruak a la ṭha lo hle a, chinfel a la ni lo tih sawiin, buaina ti reh tur chuan sorkar laipui aṭangin hmalakna felfai tak a awm a ṭul thu a sawi bawk.