Meghalaya : Sorkarin lower primary school thuam ṭha

Meghalaya state sorkar chuan zirna infrastructure tih changtlunna kawngah nasa taka hma lain, Lower Primary (LP) school 90% vel thawm ṭhat hna a kalpui mek. Education minister Rakkam A Sangma chuan sorkarin zirlaite tana zirna boruak ṭha tak siamsak a tum thu sawiin, SSA leh Adhoc school-te pawh an mamawh phuhruk tura ruahmanna siam belh a nih thu a sawi.

Sorkar LP school tam zawk chu tih changtlun a nih laiin, school ṭhenkhat 100 aṭanga 200 vel chuan sanction an la nghah thu an sawi a, thawm ṭhat hna thawh vat a nih tur thu Minister chuan a tiam bawk. SSA leh Adhoc tan tihfel tur tam tak a la awm thu leh, fund dang aṭanga hnathawh tura ruahman a nih thu a sawi bawk a ni.

Minister chuan hmun hrang hrang aṭanga sum thawhkhawmna kawnga sorkarin thawhpuina ṭha tak chu a dawng chu a fak hle. MDC, MP, MLA ṭhenkhatte leh, CMSDF aṭanga sum an thawhkhawm thu sawiin, section hrang hrang aṭanga sum an dawn hmangin heng hna te hi an thawh thu a sawi. A bial chhunga school pakhatin inchung leh tukverh mumal a nei lo nia sawi a nih avangin, “SSA emaw sorkar LP emaw pawh ni se, school 45-te siamṭhat hna thawhnan Rs nuai 2 ve ve ka sanction tawh a ni,” tiin a sawi.

South Garo Hills-a Rongara C&RD Block hnuaia Seelpang Government LP School siamṭhat an phut chungchanga A’chik State Peoples’ Front (ASPF)-te zawhna chhangin, Sangma chuan he thil hi chinfel a nih tawh thu a sawi a, "BDO-in fund a dawng tawh niin ka hria a, hna pawh kalpui mek a ni,” a ti.