Assam : NEET exam langtlang taka kalpui nan hmalakna khauh tak siam

Assam chief minister Himanta Biswa Sarma chuan Thawhṭanni khan NEET exam lo awm turah state chu langtlang taka kalpui turin thuchhuah a siam. Chief Minister hian Assam Police-in state chhunga private exam centre ṭhenkhata thil dik lo thleng nia sawi chungchang an chhui hnuah thuchhuah hi a siam a ni.

Hemi chungchangah hian CM Sarma chuan Thawhṭanni khan senior official-te leh National Testing Agency (NTA) Director General-te nen virtual meeting an nei. A official social media X-ah CM chuan state chuan exam apiang chu langtlang taka kalpui a tum thu a sawi.

NEET exam pawimawhzia sawiin, CM chuan dik leh felfai taka kalpui a nih theih nan hmalakna khauh tak siam a nih thu sawiin, sorkarin state puma NEET exam kalpui dan tih chak tumna point 9 awmna a rawt tih a sawi bawk. NEET dikna chanvo humhalh nan state chuan sorkar leh sorkar hnuaia college exam centre zawng zawngah venhimna khauh tak kalpui a nih tur thu a sawi bawk.

Thuneitute chuan exam centre zawng zawngah Aadhaar-based/biometric verification tih ngei ngei tur a ni tih sawiin, centre-a exam kalpui dan tur CCTV hmanga enfiah vek a nih tur thu an sawi. Thuneitute chuan Standard Operating Procedures (SOP) chipchiar taka kalpui a ni dawn tih an sawi bawk. District Commissioner (DC) leh Superintendent of Police (SP) te chuan exam hma ngeiin exam centre tinte an tlawh dawn bawk a ni.