Court-in Sharmila-i thiam chantir, Party thar din a tum

Manipur district court chuan Nilaini khan Armed Forces Special Powers Act (AFSPA) hlih a nih theih nana chaw nghei a kalpui avanga mahni intihhlum tuma puh Irom Chanu Sharmila-i chu thiam a chan tir. Court-in thiam a chantir hnu hian tun thla chhung ngeia political party thar a din tur thu Sharmila chuan a sawi.

Imphal West Chief Judicial Magistrate Lamkhanpao Tonsing chuan, IPC section 309 tlawhchhana mahni intihhlum tuma puhnaah Sharmila chuan hnehna a chang ta tih a sawi. Sharmila hi August thla khan he thubuaiah vek hian court-ah a lo inlan tawh a, Chief Judicial Magistrate chuan Personal Recognition (PR) Bond sign tirin, August 9 2016 khan bai-a chhuah a ni.

Manipur 'Iron Lady' hian AFSPA hlih phutin, kum 16 chhung chaw nghei a kalpui a ni. A chetdan avang hian IPC section 309 tlawhchhanin, mahni intihhlum tumah puhin thubuai siam sak a ni. Court-ah vawi eng emaw zat a lo inlan tawh a, thiam a chang ta a ni.

August thla vek khan Sharmila-i hian kum 16 chhung zet chaw nghei a kalpui tawh chu a titawp tih a puang a, politics-ah a zuan luh tur thu a puang zui bawk. Nilainia court-in thiam a chantir hnu hian, Sharmila-i chuan thuthar thehdartute kawmin, October thla chhung ngeia political party a din tur thu a puang. Sharmila-i chuan Manipur Assembly election-ah chuh ngei a tum thu sawi nawn lehin, party thar a din tur thu a sawi. August thla khan chief minister nih a duh thu leh AFSPA hlih a nih theih nana a beih zel tur thu a lo sawi tawh bawk a ni. Sharmila-i chuan party hrang hrang aṭangin sawmna a dawng tih sawiin, a hnawl thu leh Independent-a din a tum thu pawh a lo sawi tawh.

Sharmila-i hian politics chungchangah Delhi Chief Minister Arvind Kejriwal chu a lo titipui tawh a, Prime Minister Naredra Modi pawh hmuh a duh thu leh, a hnen
aṭanga thurawn lak a duh thu a lo sawi tawh a ni. Party thar a din tur thu a puan tak avang hian Irom Chanu Sharmila-i hian ngaihven a hlawh zual hle.