China thil siam lei lo turin ngen

Assam minister Himanta Biswa Sarma chuan, China-in Brahmaputra lui fintu a dan chah avangin mipuite chu China thil siam lei lo turin a ngen.

China chuan hydro-electric project atan Brahmaputra lui fintu Tibet-a Xiabuqu lui chu a khuap a, hei hian Assam state tan harsatna a thlen a hlauhthawnawm nia sawi a ni. Brahmaputra lui hi Assam mipuite eizawnna leh inghahna pawimawh tak a nih avangin, Chief Minister hlui Tarun Gogoi pawhin Prime Minister hnenah lehkha a lo thawn tawh bawk.

Sarma chuan, "Ka ngaihdan chuan India-in China thil siam chhuah a lei lo ngam tur a ni. Durga Puja leh Diwali-te kum tin lawm a ni ṭhin a, heng hunah te hian ‘Made in China’ tih chuang chu hnawl ngam a ngai a ni" a ti. Thla hmasa lawk khan Hindu Yuva Chatra Parishad Assam unit chuan mipuite chu China thil siam chhuah reng reng lei lo tura an duh thu an lo sawi tawh bawk.

Hetih lai hian Assam minister thusawi hi hmarchhaka hel pawl lian United Liberation Front of Assam-Independent (ULFA-I) chuan chhang letin, mipuite chuan duhthlanna an nei a, a man tlawm zawk lei lo tura intih ngawt theih a ni lo tiin, China thil siam lei lo tura campaign lo turin an ngen tih an sawi.

China chuan Xiabuqu lui khuapa project kalpui nan hian USD 740 (million) a ruahman a, June 2014 aṭang khan hna
ṭan niin, 2019-ah zawh hman turin a ruahman. Tibet aṭangin Brahmaputra lui hi India-ah rawn luang lutin, Arunachal Pradesh paltlangin Assam-ah a luanglut a ni. Lui khuah a nih avang hian mi thiamte chuan kawng hrang hrangah harsatna a awm thei dawn niin an sawi. Hetih lai hian October 2013 khan ram pahnihte chuan Beijing-ah 'trans-border river' chungchangah inremna an lo ziak tawh nia tarlan a ni.