Modi-a'n hmarchhak ngaipawimawh

Arunachal Pradesh Chief Minister Pema Khandu chuan Ningani khan Prime Minister Narendra Modi chu hmuin, an state mamawh hrang hrangte a sawipui.

PM Modi chuan hmarchhak hmasawnna chu a kaihhruai sorkar-in a ngaipawimawh hle tih sawiin, a mimal tak pawhin Arunachal hmasawnna chu a ngaihpawihmawh thu Khandu alo hrilh. Modi chuan, Arunachal chu state ralmuang tak a nih thu sawiin, hmasawnna kawng a zawhchho mek zel a ni, a ti. State-in leilung mawina leh hausakna a neihte haichhuah kawngah hmalakpui a huam thu sawiin, a bikin tourism lamah ṭan lak pui a inhuam thu a lo hrilh a ni.

CM Pema Khandu chuan PM hnenah hian state sorkar sum indaihlohna chungchang sawipuiin, leiba a tam avangin sorkar laipui aṭanga scheme duan kalpui danah state sorkar-in harsatna a neihte a thlen. An state chuan 7th Pay commission hmang turin sum leh paiah harsatna a tawk tih sawiin, hmalak pui turin a ngen. Chief Minister hian an state mamawh hrang hrangte Modi hnenah hian ziakin a thlen.

Tun hi Arunachal Pradesh-a Congress sorkar ṭhiat a, People's Party of Arunachal sorkar a din hnua Pema Khandu leh Narendro Modi-te'n meeting an neih lehna hmasa ber a ni. People's Party of Arunachal hian BJP kaihhruaina hnuaia din, hmarchhak huam chhunga party hrang hrangte inzawm-khawmna North East Democra-tic Alliance (NEDA) a zawm a ni.

Khandu hian sorkar laipuia mi pawimawhte dawr turin New Delhi a pan a, Union Minister for Urban Development Venkaiah Naidu chu Nilaini khan hmuin, Pasighat leh Itanagar khawpuite chu Smart City project-ah telh a nih ve theih nana hmalakpui turin a ngen. Khandu chuan Pasighat chu airport awmna hmun a nih vang te, rail service-in a paltlang vang tein kawng hrang hrangah thuam ṭhat a ngai niin a sawi.

Union Minister chu sorkar laipui scheme - Jawaharlal Nehru National Urban Renewal Mission (JNNURM), Individual Household Latrine (IHHL) leh a dangah te sum pe chhuak chak turin a ngen. Heng bakah hian Khandu chuan, Pasighat, Namsai, Roing, Tawang leh Jairampur-a Inter-State Bus Terminus din tura ruahman mekah hmalakpui turin Venkaiah Naidu chu a ngen bawk.