AP sorkar leh CII-te'n inremna ziak

Arunachal Pradesh sorkar leh Confederation of Indian Industry (CII)-te chuan thawk dun turin Ningani khan inremna an ziak.

Inremna hi Hotel Taj-ah ziah niin, state aiawhin Chief Minister Pema Khandu, Deputy CM Chowna Mein, Chief Secretary Sha­kun­tala D Gamlin leh Commi­ssioner Investment Ashish Kundra-te an tel. Inremna an ziah dan chuan, CII hian state sorkar-in HydroPower project, Skilling, Tourism, Horticulture/floriculture, Agro-processing leh Information Technology lama hma a lakna te a pui dawn a ni. Hnathawh tur duang tur leh vil turin high level Joint Task Force din an remti bawk. CM Khandu chuan, “Arunachal hi state ralmuang tak a ni a, leilung hausakna a neihte pawh chenfakawm tham a ni. Tourism, hydropower, agro-horti leh thil dangah te hma a sawn zel a, tunah CII nen thawk dun tura inremna ziak a ni leh ta hi a lawmawm hle a ni" a ti.

CM chuan an state-in hma a sawn mek zel tih sawiin, industry lamah nasa zawka ṭan lak mek a nih thu a sawi. State chhungah invesment nasa zawka kalpui a nih theihna turin sorkar laipuiah rawtna a thlen tur thu a sawi. Arunachal-in kawng hrang hrangah hma a sawn mek thu te, inremna ziah a nih leh tak avangin hmabak eng tak an nei tih CM Khandu chuana sawi. Confederation of Indian Industry (CII) hi kum 1895-a din niin, member 7200 chuang an awm mek a, ram chhung hmun hrang hranga an inzarpharh a ni.