Dan loa lutten Assam an chhuahsan ang : Sonowal

Assam Chief Minister Sarbananda Sonowal chuan, khua leh tui diktakte chu humhim zel an nih tur thu sawiin, dan loa Assam-a pem lutte chuan state an chhuahsan a ṭul dawn niin Nilaini khan a sawi.

Rabindra Bhawan, Guwahati-a Nepali Sanskriti Suraksha Parishad-te meeting buatsaih a hmanpuinaah he thu hi CM hian a sawi a ni. Sonowal chuan Nepali-te chu hnam huaisen leh taima tak an ni tiin, an state-a Nepali cheng leh khawsa mekte chu an dinhmun a ṭha a, right to citizenship an nei a ni, a ti. Nepali-te chu an huaisenna leh an dawhtheihna avanga hriat hlawh an nih thu a sawi bawk.

Meeting-a kalkhawmte chu state sorkar hmalakna thlawp tura ngenin, Assam chu India rama state hmasawn ber ni thei tura thawhpuiah a sawm. State chhungah hnam hrang hrangte inkarah inunauna awm zel tura a duh thu sawiin, Bangladesh aṭanga dan loa Assam-a lutte chuan an state an chhuahsan tur thu a sawi a ni.