Manipur : Congress-in Supreme Court-ah petition thehlut

Manipur Congress chuan April 15 khan Waqf Amendment Act 2025 an dodal avangin Supreme Court-ah petition an thehlut. Hemi hma hian Congress legislature party hruaitu, Chief Minister vawi thum lo ni tawh, Okram Ibobi Singh chuan he dan siamṭhat hi dan kalh a nih thu leh, state unit-in Supreme Court-ah an dodal dawn tih an lo sawi tawh a ni.

New Delhi aṭanga journalist thlan bikte a kawmnaah Congress thupuangtu Rabi Khan chuan, "Manipur Congress working president Md Fajur Rahim leh MLA hlui Md Amin Shah te chuan nimin khan Supreme Court-ah Waqf Amendment Act 2025 dodalna hi an thehlut a ni," a ti. Manipur Congress hmalakna a nih thu sawiin, Nilaini hian he thubuai hi ngaihtuah a nih kan beisei a, apex court-in he dan hi a hlih ngei an beisei thu a sawi.

Tun hnai khan Ibobi Singh chuan, “He dan hi kan dodal a, India ram hi secular hnam ni mah se tuna NDA sorkar hian Muslim leh hnam tlem zawk dangte a bei mek a, Waqf Amendment Act hi constitution bawhchhiatna nasa tak a ni a, pawm a ni dawn lo,” a ti.

Manipur-ah he dan chungchangah hian nawrh huaihawt niin, BJP Minority Morcha state president Md Asker Ali-a'n social media-a he dan a thlawp thu a sawi avangin mipuiin a in an hal sak a, he thil thlen hnu hian a thusawi chu a hnukkir ​​leh ta a ni.