Assam : Waqf Act dodalna lantirnaah mi 7 man

Assam-a Cachar district-a Waqf (Amendment) Act duh lohna lantira nawrh huaihawttute leh police-te inkarah buaina a chhuak a, hemi kaihhnawihah mi pasarih man an ni.

Pathianni khan nawrh huaihawtte hian Berenga Village aṭangin phalna nei loin Silchar lam an pan a, pungkhawmte hian police-te chu lung in an vawm a ni. District chhungah tharum thawhna a chhuah belh zel lohna turin khapna thupek tihchhuah a ni bawk. Silchar police station-ah thubuai ziahluh a ni a, Thawhlehni khan Bagadahar leh Kashipur area-ah beihpui thlak niin, mi pasarih man an ni. Tualchhung court chuan an mi mante hi judicial custody-ah a dah leh a ni. Inhnamhnawihna nei mi dangte pawh chhui zui mek an ni.

Assam chief minister Himanta Biswa Sarma chuan Thawhlehni khan state chhungah Waqf Amendment Act, 2025 duh lohna lantir phal a ni dawn lo tih sawiin, nawrh huaihawtte chu Supreme Court-ah an lungawi lohna chingfel tura kal turin rawtna a siam.

Waqf (Amendment) Act hi Parliament-a pass a nih hnuah mimal leh pawl eng emaw zatin an duh loh thu an lo sawi tawh a ni.