Meghalaya: Mi nuai 6 velin Aadhaar an nei lo

Meghalaya-a cheng mi nuai 6 vel chu Aadhaar nei loin an la awm a, hei hian sorkar aṭanga hamṭhatna leh hmasawnna scheme pawimawh tak takte an dawn theihna tur a tikhawtlai a ni. East Khasi Hills leh West Garo Hills district-ah Aadhaar a inziak lut hi an tlahniam hle a, mipui 75% leh 83%-in enrollment an nei a, mi nuai 3.27 chuang inziak lut lo an awm.

“Mi zawng zawng Unique Identification Authority of India (UIDAI) hnuaia an inziah luh theih nan taima takin kan thawk mek a ni,” tiin senior official chuan a sawi. Tun dinhmunah hian state chhungah mi nuai 28 vel an inziak lut tawh a ni.

East Khasi Hills-ah chuan mi nuai 2.31 chuang an la inziak lut lo a, West Garo Hills-ah mi 96,400 chuang inziak lut lo an awm thung. He thil hian registration kalpui dan chu mipui ṭhenkhat zingah ngaihsak lohna nasa tak a lantir a, West Khasi Hills leh South Garo Hills te chu enrolment tlem district zingah telin, enrolment 68% leh 67% chauh an awm.

Enrolment chung­changah harsatna awm mah se, tun hnai khan Meghalaya sorkar chuan Aadhaar enrolment lama hmalaknaah theihtawp chhuahin,naupangte tana mandatory biometric updates (MBU) kalpui leh puitling Aadhaar enrolment verify-na kawnga state ti ṭha ber a nih avangin chawimawina pahnih a dawng. Thuneitute chuan naupang kum nga hnuai lam 37,000 chuang hlawhtling takin an ziak lut tawh a, naupang kum 5 leh 18 inkar mi nuai 6.93 chuang pawh an inziak lut tawh bawk.

Official-te sawi danin, Meghalaya sorkar chuan Unique Identification Authority of India (UIDAI) hnuaiah mi zawng zawng inziak lut vek turin hma a la mek a, tunah hian state chhungah mi nuai 28 velin registration an zo tawh a ni.