Arunachal Pradesh: Deputy CM hoin high-level review meeting nei

Arunachal Pradesh deputy chief Minister Chowna Mein hoin DC Conference Hall, Namsai-ah ‘Comprehensive Scheme for Strengthening the Transmission and Distribution System’ chungchangah high-level review meeting neih a ni a, state chhung hmun hla leh service tlakchhamna hmuna power supply rintlak leh ṭha zawk neih theihna tura hna chak zawka kalpui chu ngaih pawimawh ber a ni.

He scheme pawimawhzia sawiin, Dy CM chuan Arunachal Pradesh-in power sector-a hmasawnna chak tak a hmuh avangin hydropower project tam tak kalpui mek a ni a, transmission and distribution (T&D) infrastructure tih chak chu a hun taka power lak chhuah leh pek chhuahna atan a pawimawh hle a ni, a ti.

Meeting-ah hian scheme hnuaia hmasawnna awmte thlir letin, hun bituk chhunga zawhfel a ṭul thu a sawi bawk. Power Grid Corporation of India Ltd. (PGCIL) chu Revamped Distribution Sector Scheme (RDSS) hnuaia hna la awm mekte ti khawtlaiah puhin district administration leh power department nena thawh hona tha tak nei turin a chah. Chutih rualin a taka kalpui a nih theih nan tualchhung mi thlan bikte an tel theih nan hma la turin a ngen bawk. Power infrastructure project pawimawh pathum commission a nih thu a puang bawk a, chungte chu 33 kV side of 132 kV Niglok sub-station, 33 kV Niglok–Ruskin Line, 33 kV Oyan Sub-station te an ni.

Sawi honaah hian district hrang hranga mamawh awmte ngaihtuah a ni bawk a, state-in energy a mamawh zual zel nena inmil taka infrastructure tih chak dan tur zawn a ni bawk.